|
Зумыда эским, мый ми – вермам
Егор Тимофеевич чужлöма 1919 вося март 20 лунö Бадьёльйыв грездын. 1939 вося октябрь 17 лунö босьтöмаöсь армияö. Служитöма Ылi Асыввылын, Хасан ты дорын. — Кык во мысти косйисны нин демобилизуйтны, лэдзны гортö, — висьтавлiс Егор Тимофеевич, — но командир строй водзын шуис миянлы: «Ребята, войны не миновать». Сэсся тöлысь чöж тöварнöй вагонъясын мунiм рытыввывлань. Война заводитчигöн кадрöвöй армиялöн часьтъясыс вöлöмаöсь нин Румыниякöд суйöр дорын. Красноармейскöй книжкаас пасйöма: «22 июня 1941 года. Действующая армия. Юго-Западный фронт». 1941 вося гожöмнас да арнас связьлöн 96-öд торъя батальоныс, кöнi служитöма Егор Уляшев, тышкасьöма Рытыввыв Украинаса Черновцы кар дорын. Тышъясöн кыкысь вуджлöмаöсь Прут да Днестр юяс. — Кыдз вермим водзсасим, но ковмис бӧрыньтчыны, — казьтылiс вöвлöм салдат. — Гожöм, жар, горшыд косьмö, юнытö некысь, струбаяссьыс васö диверсантъяс тшыкöдöмаöсь. Гумовтан касканад няйт гöптысь номырöсь ва да юан. Тышъясыс вöлiны зэв чорыдöсь. Немечлöн вöлi ён техника: танкыд нырö, миномётыд шырö, вылiсянь авиация бомбитö. А миян — йöзыс эм, а выныс абу. Война заводитчигöн техникаыд ёнасö эз вöв, да и важ, водзсасьнытö он вермы, бöрыннас тай «катюшаясыд» лоины да швачкисны-а. Зэв вöлi забеднö. Сы мында салдат пöгибнитiс. «Барбаросса» план серти немеч командование кöсйöма зэв öдйö босьтны из шомöн, бур муöн озыр Украина. Гöрд армиялы паныд уськöдчöма «Юг» армиялöн 57 дивизия, 13 бригада да авиация. Войналöн медводдза лунъясö гитлеровечьяслöн выныс миян серти 6-8 пöв ёнджык вöлöма. Львов да Черновцы дорса тышъясын усьöма 241 сюрсысь унджык сöветскöй салдат да офицер. — Мунö тыш. Окопын ме связист — командиркöд орччöн. Командирным — томиник на лейтенант, сöмын сувтiс, кöсйис на «В атаку!» горöдны, но кырссьыштiс пулемёт, и командирным уси веськыда ме вылö. Миянöс сэки дзоньнас тыртiс муöн, гырдöн. 1941 вося сентябрь 14 лунö Егор Уляшев ранитчöма, орччöн мина усьöма да. Евпаторияса госпитальын операция дырйи коксьыс да боксьыс перйöмаöсь вель уна кöрт тор. Госпитальын тöлысь бурдöдчöм бöрын ыстöмаöсь Карельскöй фронт вылö. — Ме война дырйиыд странасö дзоньнас кытшовтi, — висьтавлiс ветеран, — асыввывсянь рытыввылöдз и лунвывсянь войвылöдз. Войвылö мунöмаöсь поездöн Сталинград дортi, карыс вöлöма дзонь на. 1941 во ноябрсянь 1944 вося июньöдз Егор Тимофеевич служитöма Карельскöй фронтса 77-öд морскöй стрелкöвöй бригадаын; 1944 вося июнь-декабрö — связьлöн 635-öд торъя ротаын; а сэсся 1947 вося майöдз — связьлöн 789-öд батальонын отделениеса командирöн. Батальоныс сулалöма Мурманск областьса Кандалакша карын. Фашистъяслöн вöлöма мог — Кандалакша дорын орöдны Мурманскöс странакöд йитан кöрт туй, а сы бöрын и дзоньнас Кола кöджсö босьтны. Танi вöрöглы паныд водзсасьöма миян 19-öд армия. — Война вылад связьтöгыд некыдзи: абу связь — абу армия, — шулiс фронтöвик. — Ёна бомбитöм понда кабельыд орлывлiс, и связистлы ковмылic котравны öтарсянь мöдарö, тшöкыда и «по-пластунски» — нюжöдны-йитны провод. Сьöрсьыд телефон, кабель, автомат, ППШ диск, патрона сумка, граната, зыр, вещмешöк. Кыйöдöны снайперъяс. Кысся öтчыд, юрöс ог лысьт лэптывны — и дзенгис пуля, веськалiс сапöг коклябöрö. Но век жö вои коланаинöдз. Куим во чöж ми кутiм Верман ю дорын оборона, эг лэдзöй вöрöгöс водзö пырны. Гöгöр вöр, нюр да из. Граната пасьмунас да, торъясыс нöшта на и изсяньыс швачмунöны-лэбöны. Вöрыд сотчö, гöгöр сьöд мыр. Тöвнас кöдзыд, 40 градусöдз лэччывлö. Бипур оз позь öзтыны: луннас немечыд тшынтö казялас, войнас битö, сэтчö и лыяс. Йöзыс ёна и кынмалiсны, торйöн нин лунвывсаяс. Ми, войвывсаыд, велалöмаöсьджык кöдзыдас. Карельскöй фронтын комиыд уна вöлöма, но мекöд некод эз веськавлы. Немечьяс громкоговоритель пыр миянлы горзöны: «Рус, сдавайтчы, миян шнапс эм». Асьныс ёна жö юлöмаöсь, уна тыртöм сулея кольöмаöсь пышйигас. А сiдзжö техникасö да боеприпассö. Некымын вотö воюйтiгад да вöрад землянкаын олiгад мортыд лоö дзик звер кодь — пуляысь он нин пов, минаысь тай лажыньтчывлан-а. Миян взводын вöлiм роч, украинеч, чуваш, армянин да ме — коми. Öта-мöдлы отсавлiм, кодöскö кедзовтöм йылысь и думыштны эг кужлöй. Ме армияын бура велалi сёрнитны рочöн. Командиръясöс пыдди пуктывлiм, дисциплина зэв бур вöлi. Некор эг тöдлöй, ранитчам-ö, колям-ö ловйöн, но век зумыда эским, мый ми — вермам. Мöд ногöн некор ньöтчыд весиг эг думыштлöй. Медальтö салдатыд фронт вылад эз аддзыв: кодi штаб дорын, сылы медальыд вичмылiс. «Тайö тыш бöрас ставнытö орден вылö представита», — тыш водзын шуис коркö миянлы командир. Но ачыс сэки уси. Ветеранлöн эмöсь «За отвагу», «За оборону Советского Заполярья», «За Победу над Германией в Великой Отечественной войне 1941-1945 гг.», юбилейнöй медальяс, II степеня Отечественнöй война орден. Егор Тимофеевичлöн меддона, медыджыд праздникыс — Май 9 лун, Победа лун. — Война кусöм бöрын менö, кыдзи кадрöвöй военнöйöс, кольöдлiсны нöшта на кык во кежлö том салдатъясöс велöдны. Демобилизуйтчи 1947 вося май 20 лунö. Армияын служитi 8 во, на пиысь нёльсö — фронт вылын. Ичöтджык Öльöксан вокöй уси война вылын, батьöй фронт вылысь воис кок пöлаöн. …Неыджыд Бадьёльйыв грездысь война вылын усьöма 112 морт. Ирина ЧИСТАЛЁВА. Помöсдiн сикт, Кулöмдiн р. Коми му, 2015, Май 7 лун. |
